Exodus 27 in Boko

1 Sa'okĩi kɛ ń lɛpusialio, a gbã̀a iↄ gã̀sĩsuu sↄo, a yàasa iↄ gã̀sĩsuu sↄo lↄ. A gbã̀a ń a yàasao iↄ sáa, a lɛsĩ sↄ̃ gã̀sĩsuu àaↄ̃.

2 Sa'okĩipi kɛ ń a kↄ́baↄ gↄ̃̀ↄ mɛ̀n síiↄ̃ gola ń golao, ní mↄgotɛ̃ kúlɛ sa'okĩipiwa.

3 Sa'okĩipi pↄkeleↄ kɛ ń mↄgotɛ̃o, a oo túfukabↄↄ ń a pɛ́ɛluↄ ń a au'ɛlɛbↄↄ ń a saaↄ ń a tɛ́sibↄↄ píi.

4 Mↄyãayãana pí sa'okĩipi pↄ́ ũ ń mↄgotɛ̃o. Mↄgotɛ̃ zã pi mɛ̀n síiↄ̃, ní dↄdↄ mↄyãayãanapi golaↄwa.

5 Mↄyãayãanapi sↄlↄ sa'okĩi zíɛ, ní fɛlɛò musu e à ka sa'okĩipi guo.

6 Lɛpusiali ã́ pↄ̃̀ↄpↄ̃ↄ sa'okĩipi pↄ́ ũ, ní kpá ń mↄgotɛ̃o.

7 Lipↄ̃ↄↄpiↄ sↄlↄsↄlↄ zãpiↄu sa'okĩi kpɛla ń kpɛleo a sɛbↄ ũ.

8 Sa'okĩipi kɛ ń lipɛpɛɛↄ, iↄ ɛ vĩ, lá má ↄ̀lↄnɛ gbɛ musuwa.

9 Kaa da zwã̀akpɛi, a gɛↄmidↄkĩi oi iↄ gã̀sĩsuu basↄo, iↄ zwãa pↄ́ wa tã̀ ń bataɛao vĩ

10 ń lipɛlɛo mɛ̀n bao. Ní a zɛbↄↄ pí ń mↄgotɛ̃o mɛ̀n bao, ní lipɛlɛ káloↄ ń mↄ̀pↄ̃ↄↄ pí ń ã́nusuo.

11 A gugbãntoo oi zwã̀a gbã̀a iↄ gã̀sĩsuu basↄo màa lↄ ń lipɛlɛo mɛ̀n bao ń a zɛbↄ pↄ́ wa pì ń mↄgotɛ̃oo mɛ̀n bao, ní lipɛlɛ káloↄ ń mↄ̀pↄ̃ↄↄ pí ń ã́nusuo.

12 Naa bɛ'aɛ oi kaa yàasa iↄ gã̀sĩsuu blakwi ń zwãao ń a lipɛlɛo mɛ̀n kwi ń a zɛbↄo mɛ̀n kwi.

13 Naa gukpɛ oi kaa yàasa iↄ gã̀sĩsuu blakwi.

14 Zwã̀a gã̀sĩsuu gɛ̃o iↄ ku kaa lɛ́ ↄplaai ń a lipɛlɛo mɛ̀n àaↄ̃ ń a zɛbↄo mɛ̀n àaↄ̃.

15 Zwã̀a gã̀sĩsuu gɛ̃o iↄ ku ↄzɛɛi lↄ ń a lipɛlɛo mɛ̀n àaↄ̃ ń a zɛbↄo mɛ̀n àaↄ̃.

16 Kaapi lɛ́ zwãa iↄ gã̀sĩsuu bao ń a lipɛlɛo mɛ̀n síiↄ̃ ń a zɛbↄo mɛ̀n síiↄ̃. A zwãapi iↄ dɛ pↄ́lɛ pↄ́ wa tã̀ ń bataɛao wà gↄ̃inakɛ̀wà ń babuunao ń bà gàaluladeo ń wↄ̃ↄtɛ̃nao ũ.

17 Kaa lipɛlɛ pↄ́ lìaiↄ iↄ mↄ̀pↄ̃ↄↄ ń kálo pↄ́ wa pì ń ã́nusuoↄ vĩ ń a zɛbↄ pↄ́ wa pì ń mↄgotɛ̃oↄ.

18 Kaapi gbã̀a iↄ gã̀sĩsuu basↄo, a yàasa gã̀sĩsuu blakwi, a lɛsĩ sↄ̃ gã̀sĩsuu sↄo. A zwãaↄ iↄ dɛ pↄ́lɛ pↄ́ wa tã̀ ń bataɛao ũ, iↄ zɛbↄ pↄ́ wa pì ń mↄgotɛ̃o vĩ.

19 Zwã̀akpɛ pↄkele pↄ́ wàli a zĩkɛoↄ píi, baa a kũbↄↄ ń a kaa kũbↄↄ, wa pí ń mↄgotɛ̃o píiɛ.

20 O Isailiↄnɛ aali mↄnɛ ń nísi íwao dau pↄ́ ũ, kɛ́ a filiaↄ lí e aaↄ gupu.

21 Aalona ń a nɛgↄ̃ɛↄ líↄ filiapiↄ kɛkɛ kpaaũkpɛpiu zwãa pↄ́ kpaa ikoyã kpagoloi kpɛɛlɛ oi, ìliↄ naa ma aɛ we za oosi e gu gɛ lí dↄò. Yã́pi iↄ dɛ Isailiↄnɛ yãdilɛa láasai ũ e an buiwa.