Exodus 15 in Boko

1 Ɔ̃ Mↄizi ń Isailiↄ píi lɛɛ bee sì Diiɛ aa mɛ̀: Má lɛsi Diiɛ, asa à tↄbↄ̀, à sↄ̃deↄ ń ń sↄ̃́ↄ kà ísiau.

2 Dii mɛ́ ma gbãa ũ, má lɛ́mawà, aàpi mɛ́ ma suabà. Ɔ̃mɛ ma Lua ũ, má aà táasilɛ. Ɔ̃mɛ ma mae Lua ũ, má aà tↄbↄ.

3 Diiá zĩgↄ̃ɛ, aà tↄ́n Dii.

4 À Falaↄ̃ↄ sↄ̃́goↄ ń aà zĩgↄ̃ↄ kà ísiau, à zĩgↄ̃ kíaↄ sↄ̃̀ↄlɛ Ísia Tɛ̃au.

5 Ípi dàńla, aa kpàlɛ zĩ́lɛ lán gbɛwa.

6 Dii, n ↄplaa n gbãa tↄbↄ̀, Dii, n n ibɛɛↄ ulↄ̀ ń n ↄplaao.

7 N n wɛ̀lɛↄ nɛ̀ n gawi zↄ̃ↄ guu, n pↄ pà, n ń kwɛ́ lán sɛ̃wa.

8 N pↄbↄ̀ n níu, ↄ̃ í fɛ̀lɛ, a zɛa lán bĩ́iwa, ísia í ì a guoguo.

9 Wá ibɛɛpiↄ mɛ̀, wa pɛ́lɛwázi wà wá leɛ, wi wá pↄ́ↄ síwá lá wa yeiwa, wi ń fɛ̃ndaↄ wo wà wá dɛdɛò.

10 N n lɛ́'ĩana gbàɛ, ↄ̃ ísia dàńla, aa kpàlɛ lán bɛↄmawa í zↄ̃ↄpiu.

11 Dii, tã́a kpele mɛ́ muaannↄi? Démɛ muaannↄi? Yãbↄnsaɛkɛna, n zↄ̃ↄkɛ adoa, n gawi ì to vĩa wá kṹ.

12 N n ↄplaa dↄ̀, ↄ̃ tↄↄlɛ ń mↄmↄ.

13 Ńyↄ̃ dↄaa wá gbɛ̃́ pↄ́ n wá bóↄnɛ n gbɛ̃kɛ guu, ńyↄ̃ gɛ́wanↄ n bùsuu ń n gbãao.

14 Tó buipãleↄ mà, aa lualua, iwãa a ka Filitɛ̃ bùsudeↄ pↄa.

15 Ɛdↄũↄ kíaↄ bílikɛ, gili a gɛ̃ Mↄabu dↄaanaↄgu, Kanaa bùsudeↄ kúsu a kwɛ ḿpii.

16 Vĩa zↄ̃ↄ a ń kṹ, sↄ̃ i kɛ̃́ńgu, aa gↄ̃ kílikili lán gbɛwa n gbãa zↄ̃ↄ yã́i Dii, e wá gbɛ̃́ pↄ́ ń wá é n pↄ́ ũↄ gɛ̃.

17 Dii, ńyↄ̃ gɛ́wanↄ gbɛ̀sĩsĩ pↄ́ ń sɛ̀ n pↄ́ ũ kĩ́i, ní wá zɛdↄ gu pↄ́ ń dìlɛ n zↄ̃lɛkĩi ũ, n kúkĩi pↄ́ ń kɛ̀kɛ nzĩaɛ guu.

18 Dii aↄ kible gↄↄpiiɛ.

19 Kɛ́ Falaↄ̃ↄ sↄ̃́ↄ ń a sↄ̃́goↄ ń a sↄ̃deↄ gɛ̃̀ ísia guu, ↄ̃ Dii sù ń ío à dàńla, kási Isailiↄ táa'ò gugiiu ísiapiuɛ.

20 Ɔ̃ ãnabi Miliaũ, Aalona dãe, sɛ̃́sɛ̃na sɛ̀, ↄ̃ nↄɛↄ bↄ̀ tɛaàzi píi, aalɛ sɛ̃́sɛ̃napa, aalɛ ↄ̃wã.

21 Miliaũ lɛsìnɛ́ à mɛ̀: À lɛsi Diiɛ, asa à tↄbↄ̀, à sↄ̃deↄ ń ń sↄ̃́ↄ kà ísiau.

22 Mↄizi dàzɛu ń Isailiↄ, aa kɛ̃̀ Ísia Tɛ̃awa aa gɛ̃̀ Sulu guwaiwaiu. Aa táa'ò gↄↄ àaↄ̃ guwaiwaipiu, aai í eo.

23 Kɛ́ aa kà gu pↄ́ wì mɛ Mala, aai fↄ̃ a imìo, kɛ́ a fĩ̀ii yã́i. A yã́i tò wà tↄkpà gupiɛ Mala.

24 Ɔ̃ gbɛ̃́ↄ zↄadↄ̀ Mↄiziwa aa mɛ̀: Bↄ́ wá mii?

25 Mↄizi wiilɛ̀ Diiwa, ↄ̃ Dii lí ↄ̀lↄɛ̀. Kɛ́ a zù íu, ↄ̃ ípi nakũ̀. Wekĩi ↄ̃ Dii ikoyã dìlɛnɛ́ à ń yↄ̃́

26 à mɛ̀: Tó a laaidↄ̀ ma Dii á Lua ma yã́wa mɛ́ álɛ yã́ pↄ́ má yei kɛ, tó a yã́ pↄ́ má dìlɛↄ mà mɛ́ á ma ikoyãↄ kũa píi, má gyã pↄ́ má kà Egipiↄgu kee kááguo, asa mámɛmaa Dii á gbã̀gbãna ũ.

27 Bee gbɛa aa kà Eliũ, gu pↄ́ nibↄna mɛ̀n kuɛplaↄ kuu ń daminali mɛ̀n bàaↄ̃kwiↄ. Ɔ̃ aa bòokpà í saɛ we.