Ecclesiastes 7 in Boko

1 Tↄ́ na maa dɛ tulale bɛɛɛdea, mɛ́ gagↄↄ maa dɛ igↄↄa.

2 Gɛ̃a ua pↄ́ wàlɛ gɛwiipɛu maa dɛ gɛ̃a ua pↄ́ wàlɛ dikpɛkɛula, asa gbɛ̃́pii midɛan we, mɛ́ a maa gbɛ̃́ pↄ́ kúↄ yã́pi da.

3 Wɛ̃nakɛa maa dɛ yáalↄaa, oosisia gbɛa nↄ̀sɛ ì wee.

4 Ɔ̃nↄna laai ìↄ ku ua pↄ́ wàlɛ ↄ́ↄlↄuwa. Sↄũ laai ìↄ ku ua pↄ́ wàlɛ pↄnakɛuwaɛ.

5 Ɔ̃nↄna n lelea yãdaa maa dɛ swã́sɛa sↄũ n táasilɛaia,

6 asa sↄũↄ yaalↄ dɛ lán kù tɛ́ pũnaa kĩnauwaɛ. Beeá pãɛ lↄ.

7 Gbãa mↄa gbɛ̃́ↄnɛ ì to ↄ̃nↄna sↄũkũɛ, mɛ́ gbagusaɛ ì gbɛ̃́ ↄ̃̀ↄkpaɛ.

8 Yã́ midɛa maa dɛ a fɛlɛaa, sùuu maa dɛ kàamaia.

9 Ńsu to n pↄ lí pa àao, asa sↄũ mɛ́ ìↄ pↄfɛ̃ vĩ.

10 Ńsu yãgbɛa ǹ mɛ bↄ́yãi yãagↄↄ maa dɛ tiaaio, asa yãlaa bee taaá ↄ̃nↄyã no.

11 Ɔ̃nↄá pↄmaaɛ lán túbiwa, a ài vĩ gbɛ̃́ pↄ́ lɛ́ ĩatɛ̃ eↄnɛ píi.

12 Ɔ̃nↄá kpanziɛɛ, lá ↄ̃a dɛ kpanziɛ ũwa, mɛ́ dↄ̃a àin kɛ: Ɔ̃nↄnaↄ ↄ̃nↄ ì ń misi.

13 Làasookɛ Lua yãkɛaↄwa. Démɛ a fↄ̃ pↄ́ pↄ́ a kɛ̀ kolea pooi?

14 Tó gↄↄ na mↄ̀ma, pↄnakɛò. Tó gↄↄ vãiɛ sↄ̃, làasookɛ, Lua mɛ́ kɛ̀ píi, kɛ́ gbɛ̃e su àↄ a zia dↄ̃o yã́i.

15 Ma wɛ̃ni giiɛ bee guu ma yã́ɛ beeↄ è píi. Ma gbɛ̃maa è à gà a maakɛa guu, mɛ́ ma gbɛ̃vãi è àlɛ gɛ̃gɛ̃ a yãvãikɛa guu.

16 Ńsu to n maakɛa gɛ̃agɛ̃o, ńsu to n ↄ̃nↄ gɛ̃agɛ̃o. Bↄ́yãi ńyↄ̃ yã́yia nzĩawai?

17 N vãi su gɛ̃agɛ̃o, ńsu ǹyↄ̃ sↄũo. Bↄ́yãi ńyↄ̃ ga kpóoi?

18 A maa ǹyↄ̃ yã́ mɛ̀n plapiↄ kũaɛ, ńsu ↄkpaio, asa gbɛ̃́ pↄ́ Lua vĩa vĩ ì yã́piↄ zɛ́ e píiɛ.

19 Ɔ̃nↄ ì to ↄ̃nↄna gbãa àↄ dɛ wɛ̃́lɛ gbãade gbɛ̃ↄn kwiↄla.

20 Gbɛ̃maa pↄ́ ìↄ yãmaakɛ mɛ́ ìli duunakɛo ku dṹniauo.

21 Ńsu swã́sɛ yã́ pↄ́ wàlɛ ozi píio, kɛ́ tó n zĩkɛna lɛ́ n ká, ńsu mao yã́i.

22 Asa ń dↄ̃ nzĩawa, kɛ́ mpi sↄ̃ n gbɛ̃́ↄ kà dasi.

23 Ma wɛtɛ̀ yã́ beeↄi ↄ̃nↄ'ↄ̃nↄ píi, ma mɛ̀ má ↄ̃nↄkũ, ↄ̃ à zã̀kũmanↄ.

24 Ɔ̃nↄ kúkĩi zã̀, a asii zↄ̃ↄ maamaaɛ, démɛ a fↄ̃ bↄwài?

25 Ma ↄ̃nↄ ń yã́pii mio tàasikà, má yↄ̀ɛ kɛ́ mà e dↄ̃, mí yãvãikɛa dↄ̃ sↄũkɛ ũ, mí sↄũkɛ dↄ̃ mìsaikɛ ũ.

26 Má è nↄɛ pↄ́ dɛ bai ũ, aà sↄ̃á mↄmusunaɛ, mɛ́ aà ↄↄá mↄdaonaɛ, aà yã́ ì ma pↄ ya dɛ gaa. Gbɛ̃́ pↄ́ a yã́ kà Luagu ì pili nↄɛpiwa, ãma nↄɛpi ì duunkɛna kũɛ.

27 Mámɛmaa Làasoode ma mɛ̀: Yã́ pↄ́ ma bↄwà gwa. Kɛ́ málɛ yã́ gwa zɛ́zɛ mà e a midↄ̃,

28 gↄↄ pↄ́ málɛ wɛɛlɛ málɛ eo, ma gↄ̃ɛ bɛɛɛde è mɛ̀ndo gbɛ̃ↄn ↄ̀aa sↄoↄ guu, ãma baa mɛ̀ndo mi nↄɛ bɛɛɛde e ń guuo.

29 Yã́ pↄ́ ma bↄwàn kɛ: Lua gbɛ̃nazĩnaↄ kɛ̀ nↄ̀sɛpuadeↄ ũɛ, ↄ̃ aa pɛ̀lɛpɛlɛ kↄ̃ni zɛ́u.