Deuteronomy 33 in Boko

1 Sa maa pↄ́ Lua gbɛ̃́ Mↄizi ò Isailiↄnɛ e àↄ gɛ́ gain kɛ,

2 à mɛ̀: Dii bↄ̀ Sinai à mↄ̀wá, aà gawi bìlɛwá za Sei, à pìpiwɛ̃ɛ za Palana gbɛ musu, à bↄ̀ a gbɛ̃́ dasidasiↄ kĩ́i, lou lɛ́ pílɛpilɛ aà ↄplaai.

3 Dii ye a gbɛ̃́ↄzi, gbɛ̃́ pↄ́ an kua ńdoapiↄ ku aà ↄzĩ. Aaì kãaaaàzi wà aà yãma.

4 Mↄizi ikoyã dìlɛwɛ̃ɛ, wá Yakↄbu buiↄ pↄ́ ũ.

5 Dii mɛ́ gↄ̃̀ wá bui maa kía ũ, kɛ́ wá Isaili bui dↄaanaↄ kↄ̃ kã̀aa.

6 Mↄizi mɛ̀: Lubɛni buiↄ aaↄ kuɛ, aa gao, kási aaↄ dasio.

7 À yã́ɛ bee ò Yuda buiↄ yã́ musu: Dii, Yuda buiↄ wii ma, ní suńnↄ ń gbɛ̃́ↄ guu. Aalɛ gí ń ńzĩao, dↄńlɛ an ibɛɛↄ yã́ musu.

8 Levii buiↄ yã́ musu à mɛ̀: N Tumiũ ń Uliũo kpà n gbɛ̃́ náaideↄwa. N ń lɛ́ n ń gwá Masa, n zↄakàńzi Mɛliba í kĩ́i.

9 Aai ń de ń ń dao yãdao, aai ń vĩ̀iↄ ń ń dãunaↄ dↄ̃o ge an nɛ́ↄ. Aa n yã́ kũa, aa zɛ̀ ń n bàakuańnↄ yã́o.

10 Aaì n yã́ↄ da Yakↄbu buiↄnɛ, aaì n ikoyã da Isailiↄnɛ. Aaì tulaletikatɛa n aɛ, aaì sa pↄ́ wì a pↄ́ kátɛu à tɛ́kũ o ń gbagbakĩiwa.

11 Dii, báaadańgu, ní ń gba gbãa, kɛ́ zĩ pↄ́ aalɛ kɛↄ e kangu. Gbɛ̃́ pↄ́ lɛ́ fɛlɛńnↄↄ lɛ́ ń wówa, ǹ ń zangudeↄ gbɛ̃, aasu fɛlɛ lↄo.

12 Bɛ̃yãmɛɛ buiↄ yã́ musu à mɛ̀: Dii gbɛ̃́ yenzideↄ zↄ̃lɛaaànↄ dↄdↄa. Dii aↄ kàedańzi, aↄ kú ń guu gↄↄpiiɛ.

13 Yosɛfu buiↄ yã́ musu à mɛ̀: Dii báaada ń bùsuu ń fíi maa pↄ́ ì bↄ musu à kpao ń í pↄ́ kálɛa tↄↄlɛ zíɛo

14 ń pↄmaa pↄ́ ĩatɛ̃ ì to aa bↄlɛↄ ń pↄmaa pↄ́ ì bↄlɛ mↄ ń mↄoↄ

15 ń gbɛ̀sĩsĩ zi musupↄↄ ń sĩ̀sĩ pↄ́ kú za káauↄ pↄmaaↄ

16 ń pↄmaa pↄ́ kú tↄↄlɛↄ píi. Yosɛfu buiↄ na ń Lua pↄ́ kú yãa kàelɛuo, ɛ̀fãaipiↄ i su ń miwa, asa Yosɛfu á bɛɛɛdeɛ a gbɛ̃́ↄ guu.

17 Aà buiↄ aaↄ zↄ̃ↄkɛ vĩ lán zuswana nɛsana sɛ̃́iawa, aaↄ gbãa vĩ lán zùsɛ̃lɛ kↄ́baↄwa, aa málɛ buiↄzi e dṹnia lɛ́wa. Màa Ɛflaiũ bui aↄ dasi, màa Manase bui aↄ dasi.

18 Zabulↄni buiↄ yã́ musu à mɛ̀: Zabulↄni buiↄ, à pↄnakɛ laa pↄ́ álɛ taↄ guu. Isakaa buiↄ, à pↄnakɛ bɛ.

19 Aa gbɛ̃́ↄ sísi Dii gbɛ̀sĩsĩwa, aai samaa'owà we, asa aa àizɛɛ pↄ́ di ísiauↄ ble ń pↄ́ pↄ́ ulɛa bùsu'ũfãa guuↄ.

20 Gada buiↄ yã́ musu à mɛ̀: Wà Gada buiↄ bùsu Kãfĩna sáaukpa! Aaↄ wúlɛa we lán nↄ̀ↄmusuwaɛ, aa gbɛ̃́ↄ taitai ń gã̀sĩↄwa ń ń miↄ.

21 Aa tↄↄlɛ sɛ̃́ia sɛ̀ ńzĩa pↄ́ ũ, wa gbɛ̃zↄ̃ↄↄ baapi kũanɛ́ we. Kɛ́ Isailiↄ dↄaanaↄ kã̀aa, Gada buiↄ zĩkɛ̀ Dii ikoyã zɛdewa ń yã́ pↄ́ a dìlɛ Isaili bui píiɛo.

22 Dã buiↄ yã́ musu à mɛ̀: Dã buiↄá nↄ̀ↄmusu nɛ́ bↄlↄↄnɛ, aai bↄ Basana bùsuu aa kusimá.

23 Nɛfatali buiↄ yã́ musu à mɛ̀: Nɛfatali buiↄ na ń Diio maamaa, à báaadàńgu à kɛ̀ zài. Ísida ń gɛↄmidↄkĩi oi bùsuo a gↄ̃ ń pↄ́ ũɛ.

24 Asɛɛ buiↄ yã́ musu à mɛ̀: Pↄnadeↄ Asɛɛ buiↄ dɛ bui kĩniↄla, aaↄ naaànↄ dɛ ń gbɛ̃́ↄla, aa ń gbá pípi ń nísio.

25 Aa ń bↄlɛ gbã́aↄ pi ń mↄsio ń mↄgotɛ̃o, aaↄ ku dↄdↄaɛ e ń wɛ̃ni lɛ́u.

26 Bui maaↄ, gbɛ̃e muaa ń á Luaoo, ì di luabɛpuana kpɛ musu, ì mↄ dↄiálɛ a zↄ̃ↄkɛ guu.

27 Lua pↄ́ kú za zipi mɛ́ á ulɛkĩi ũ, ìↄ ↄliaázi zĩ́lɛ la gↄↄpiiɛ. Ì á ibɛɛↄ yáɛ́, ì oɛ́ à ń kaalɛ.

28 Isailiↄ iↄ ku dↄdↄa ńtɛ̃ɛ, Yakↄbu buipiↄ iↄ ku bùsu pↄ́ pↄ́wɛna ń vɛ̃ɛo diu, gu pↄ́ a mↄ̀sɛ ìↄ bↄ musu.

29 Báaadeↄn á Isailiↄ ũ, asa Dii á suabà. Démɛ kú lááwai? Ɔ̃mɛ á sɛ̀ngbao ń á dↄnlɛo ń á fɛ̃nda gawideo ũ. Á ibɛɛↄ vlãnauɛ́ á aɛɛ, íↄ bɛ ń bùsu gulɛsĩↄwa.