2 Peter 3 in Boko

1 Ma gbɛ̃́ yenzideↄ, lá plaade pↄ́ má kɛ̃̀ɛ́n kɛ. Ampii guu ma yã́ dↄ̀águ, kɛ́ à vu iu ń làasoo maaoɛ.

2 Má ye yã́ pↄ́ Lua ãnabiↄ ò yãaↄ dↄágu ń yã́ pↄ́ Dii wá Suabana dìlɛ a zĩnaↄnɛ aa òɛ́o.

3 Àↄ dↄ̃ za káau kɛ́ gↄↄgbɛzãzĩ zĩapↄeãkɛnaↄ mↄ á kɛ pↄ́ↄpↄↄ

4 aa mɛ: I a mↄa lɛgbɛ̃o lé? A ku má ni? Wá maeↄ gàga, kási pↄ́pii kú a gbɛu lá Lua dṹnia kàlɛwaɛ.

5 Kɛ́ Lua yã'ò yãa, à musu ń dṹniao kɛ̀, aa yã́pi kpà swã́aɛ. À tↄↄlɛ bↄ̀ íu, a ku ípi sabai,

6 ípi mɛ́ dà dṹnia káaua à kàalɛ.

7 Lua yã'oa doũpi mɛ́ tò musu ń dṹnia tiaɛ beeo dilɛa tɛ́ pↄ́ ũ e gↄↄ pↄ́ a yã́kpalɛkɛ ń a yãdansaiↄ, i ń kaalɛ.

8 Ma gbɛ̃́ yenzideↄ, ásu to yã́ɛ bee sã́águo: Gↄↄ do dɛ Diiɛ lán wɛ̃̀ ↄ̀aa sↄowaɛ, mɛ́ wɛ̃̀ ↄ̀aa sↄo dɛɛ̀ lán gↄↄ dowa.

9 Dii zígbia ń yã́ pↄ́ à a lɛgbɛ̃̀ kɛao lá gbɛ̃eↄ lɛ́ ewao, àlɛ mɛnakɛánↄ. A ye gbɛ̃e kaalɛo, a ye gbɛ̃́pii nↄ̀sɛlilɛɛ.

10 Dii mↄ́zĩ aↄ dɛ lán kpã́i mↄawaɛ. Zĩbeezĩ musu a gɛ̃zɛa bìoo, a pↄ́ↄ tɛ́kũ aa pia, tↄↄlɛ ń pↄ́ pↄ́ kuwàↄ aↄ ku lↄo.

11 Lá pↄ́pii a kaalɛ màa, à tó á kua àↄ ku kua ũ. À tó á kua àↄ adoa luayãmanaↄ ũ

12 wɛdↄa aà mↄgↄↄi, í wɛtã gↄↄpi ka kpakpa. Gↄↄpi zĩ́ musu a kaalɛ ń tɛ́o, a pusu i a pↄ́ↄ yↄ́.

13 Ãma Lua tↄↄlɛ dafu ń luabɛ dafuo lɛgbɛ̃̀, ↄ̃ wá wɛ́ dↄi. We maakɛa aↄ kuu.

14 Ayãmɛto ma gbɛ̃́ yenzideↄ, wɛdↄa gↄↄpizi guu à ãiakɛ àↄ ku sãasai gbãsĩsai, íↄ na ń Luao.

15 À wá Dii mɛnakɛa dilɛ suabaa ũ, lá wá gbɛ̃́ yenzide Pↄlu lakɛ̃̀ɛ́ ń ↄ̃nↄ pↄ́ Lua aà gbàowa.

16 Yã́piↄ ↄ̃ Pↄlu ì o lá pↄ́ a kɛ̃̀ↄ guu píi. Aà lápi gueↄ maa zĩ'ũ. Wɛ́siadeↄ ń gbɛ̃́ pↄ́ an zɛa gbãaoↄ aaì yã́piↄ kole, lá aaì kɛ ń Luayãtaala kĩniↄwaɛ lↄ. Màa aaì ńzĩa da kaalɛu.

17 Ápiↄ sↄ̃ ma gbɛ̃́ yenzideↄ, lá á yã́pi dↄ̃ kↄ̀, à laaika kɛ́ ikoyãdansaiↄ su á sã́sã ń ń ɛɛoo. Ásu bↄ á zɛa gbãau à lɛ́lɛo.

18 Àↄ gbã wá Dii wá Suabana Yesu Kilisi gbɛ̃kɛ ń aà dↄ̃ao guu. Ɔ̃mɛ gawi vĩ tia e gↄↄpii! Ãmi.