Luke 3 in Assamese

1 তিবিৰিয়া চীজাৰৰ ৰাজত্বৰ পোন্ধৰ বছৰত যিহূদাৰ ৰাজ্যপাল আছিল পন্তীয় পীলাত। সেই সময়ত হেৰোদ আছিল গালীল প্ৰদেশৰ ৰজা; আৰু তেওঁৰ ভায়েক ফিলিপ আছিল যিতূৰিয়া আৰু ত্ৰাখোনীতিয়া প্ৰদেশৰ ৰজা; লুচাণিয় আছিল অবিলীনী প্ৰদেশৰ ৰজা।

2 হানন আৰু কায়াফা আছিল ইহুদী সকলৰ মহা-পুৰোহিত। সেই সময়তে অৰণ্যত জখৰিয়াৰ পুতেক যোহনলৈ ঈশ্বৰৰ বাক্য আহিল।

3 তেতিয়া যোহনে যর্দন নদীৰ চৌদিশৰ সকলো প্রান্তলৈ গৈ প্রচাৰ কৰিবলৈ ধৰিলে যাতে, লোক সকলে পাপৰ ক্ষমা লাভৰ কাৰণে মন-পালটন কৰে আৰু বাপ্তিস্ম লয়।

4 ভাৱবাদী যিচয়াৰ পুস্তকত যেনেকৈ লিখা আছে: “মৰুপ্রান্তত এজনৰ কন্ঠস্বৰ শুনা গৈছে, তোমালোকে প্ৰভুৰ পথ যুগুত কৰা, তেওঁৰ বাট পোন কৰা।

5 আটাই উপত্যকা পূৰ কৰা হ’ব, প্রতিটো পর্বত আৰু পাহাৰ সমান কৰা হ’ব, একা-বেকা পথবোৰ পোন হ’ব, খলা-বমা পথবোৰ সমান কৰা হ’ব।

6 সকলো মর্ত্ত্যই ঈশ্বৰৰ পৰিত্ৰাণ দেখিব।”

7 তাতে বাপ্তিস্ম ল’বৰ কাৰণে অনেক লোক যোহনৰ ওচৰলৈ আহিব ধৰিলে। তেওঁ তেওঁলোকক ক’লে, “হে দুষ্ট বিষক্ত সৰ্পৰ বংশধৰ! ঈশ্বৰৰ যি ক্ৰোধ আহি আছে তাৰ পৰা পলাবৰ বাবে কোনে আপোনালোকক সতর্ক কৰি দিলে?

8 আপোনালোকে যে মন-পালটন কৰিছে, তাৰ উপযুক্ত ফলেৰে ফলবান হওক। নিজৰ মনতে নাভাৱিব যে ‘অব্রাহাম আমাৰ পিতৃপুৰুষ’। কিয়নো মই আপোনালোকক কওঁ যে, এই শিলবোৰৰ পৰাও ঈশ্বৰে অব্রাহামৰ কাৰণে সন্তান উৎপন্ন কৰিব পাৰে।

9 গছৰ গুৰিত ইতিমধ্যে কুঠাৰ লাগিয়েই আছে; যি গছে ভাল ফল নিদিয়ে, তাক কাটি জুইত পেলোৱা হ’ব।

10 তেতিয়া লোক সকলে তেওঁক সুধিলে, “তেনেহলে আমি এতিয়া কি কৰিব লাগিব?”

11 তেওঁ উত্তৰ দি তেওঁলোকক কলে, “যদি কাৰোবাৰ দুটা চোলা আছে, তেনেহলে যাৰ নাই তেওঁক এটা চোলা দিয়ক আৰু যাৰ খোৱা বস্তু আছে, তেৱোঁ সেইদৰে কৰক।”

12 তেতিয়া কেইজনমান কৰ সংগ্রহকাৰীয়ো বাপ্তিস্ম ল’বৰ বাবে আহিল। তেওঁলোকে তেওঁক সুধিলে, “হে গুৰু, আমি কি কৰিব লাগে?”

13 তেওঁ সেই লোক সকলক ক’লে, “যিমান কৰ আদায় কৰিব লাগে, তাতকৈ অধিক ধন নলব।”

14 কেইজনমান সৈনিকেও তেওঁক সুধিলে, “আৰু আমাৰ বিষয়েনো কি হ’ব? আমি কি কৰিম?” তেওঁ তেওঁলোকক ক’লে, “বলেৰে কাৰো পৰা ধন নলব। কাকো মিছাকৈ দোষাৰোপ নকৰিব। আপোনালোকৰ যি বেতন, তাতে সন্তুষ্ট হৈ থাকিব।”

15 লোক সকলে যিহেতু অতি আগ্রহেৰে খ্রীষ্টৰ আগমণলৈ অপেক্ষা কৰি আছিল, সেয়ে এই যোহনেই তেওঁলোকৰ সেই প্রত্যাশিত অভিষিক্ত খ্ৰীষ্ট জন হয় নে নহয় সেই বিষয়ে তেওঁলোকে মনে মনে বিবেচনা কৰি আছিল।

16 যোহনে উত্তৰ দি সকলোকে ক’লে, “মই আপোনালোকক পানীতহে বাপ্তিস্ম দিওঁ, কিন্তু মোতকৈ অধিক শক্তিমান এজন আহিছে; মই তেওঁৰ পাদুকাৰ ফিটাৰ বান্ধ খুলিবৰো যোগ্য নহওঁ; তেৱেঁই আপোনালোকক পবিত্ৰ আত্মাত আৰু জুইত বাপ্তিস্ম দিব।

17 শস্যৰ মৰণা মৰা চোতাল ভালকৈ পৰিষ্কাৰ কৰিবলৈ আৰু ধান নিজৰ ভঁৰালত চপাই থবলৈ তেওঁৰ কুলা, তেওঁৰ হাতত আছে আৰু যি জুই কেতিয়াও নুনুমায়, তাত তেওঁ ঘুলা পুৰি পেলাব।”

18 এইদৰে আন বহুতো উপদেশ দি যোহনে লোক সকলৰ আগত শুভবার্তা প্ৰচাৰ কৰিলে।

19 ৰজা হেৰোদে নিজৰ ভায়েকৰ ভার্যা হেৰোদিয়াক বিয়া কৰোঁৱা আৰু তেওঁ কৰা অন্যান্য কু-কর্মবোৰৰ কাৰণে যোহনে হেৰোদকো তিৰস্কাৰ কৰিলে।

20 তেতিয়া হেৰোদে আন এক দুষ্কর্ম কৰিলে; তেওঁ যোহনক বন্দী কৰি বন্দীশালত থলে।

21 সকলো মানুহে যেতিয়া যোহনৰ দ্বাৰা বাপ্তিস্ম লৈ আছিল, যীচুয়েও আহি বাপ্তিস্ম ল’লে। পাছত তেওঁ যেতিয়া প্ৰার্থনা কৰিলে, তেতিয়া আকাশৰ দুৱাৰ মুকলি হ’ল।

22 সেই সময়ত পবিত্ৰ আত্মা এক কপৌৰ আকৃতিৰে তেওঁৰ ওপৰলৈ নামি আহিল আৰু স্বর্গৰ পৰা এই মাত শুনা গ’ল, “তুমি মোৰ প্ৰিয় পুত্ৰ, তোমাত মই পৰম সন্তুষ্ট।”

23 প্রায় ত্রিশ বছৰ বয়সত যীচুৱে নিজৰ কার্য আৰম্ভ কৰিলে। লোক সকলৰ ধাৰণাত তেওঁ যোচেফৰ পুত্ৰ; যোচেফ এলিৰ পুত্র;

24 এলি মত্ততৰ পুত্ৰ; মত্তৎ লেবীৰ, লেবী মল্কিৰ; মল্কি যান্নায়ৰ; যান্নায় যোচেফৰ পুত্র;

25 যোচেফ মত্তথিয়ৰ পুত্র; মত্তথিয় আমোচৰ পুত্ৰ; আমোচ নহূমৰ পুত্ৰ; নহূম ইচলিৰ পুত্ৰ; ইচলি নগিৰ পুত্র;

26 নগি মাটৰ পুত্র; মাট মত্তথিয়ৰ পুত্ৰ; মত্তথিয় চিমিয়িনৰ পুত্ৰ; চিমিয়িন যোচেফৰ পুত্ৰ; যোচেফ যোদাৰ পুত্র;

27 যোদা যোহাননৰ পুত্র; যোহানন ৰীচাৰ পুত্ৰ; ৰীচা জৰুব্বাবিলৰ পুত্ৰ; জৰুব্বাবিল চল্টীয়েলৰ পুত্ৰ; চল্টীয়েল নেৰিৰ পুত্ৰ;

28 নেৰি মল্কিৰ পুত্র; মল্কি অদ্দীৰ পুত্ৰ; অদ্দী কোচমৰ পুত্ৰ; কোচম ইলমাদমৰ পুত্ৰ; ইলমাদম এৰৰ পুত্ৰ;

29 এৰ যিহোচুৱাৰ পুত্র; যিহোচুৱা ইলীয়েচৰৰ পুত্ৰ; ইলীয়েচৰ যোৰীমৰ পুত্ৰ; যোৰীম মত্ততৰ পুত্ৰ; মত্তত লেবীৰ পুত্ৰ;

30 লেবী চিমিয়োনৰ পুত্র; চিমিয়োন যুদাৰ পুত্ৰ; যুদা যোচেফৰ পুত্ৰ; যোচেফ যোনমৰ পুত্ৰ; যোনম ইলীয়াকীমৰ পুত্ৰ;

31 ইলীয়াকীম মিলেয়াৰ পুত্র; মিলেয়া মিন্নাৰ পুত্ৰ; মিন্না মত্তথৰ পুত্ৰ; মত্তথ নাথনৰ পুত্ৰ; নাথন দায়ুদৰ পুত্ৰ;

32 দায়ুদ যিচয়ৰ পুত্র; যিচয় ওবেদৰ পুত্ৰ; ওবেদ বোৱজৰ পুত্ৰ; বোৱজ চালমোন পুত্ৰ; চলমোন নহচোনৰ পুত্ৰ;

33 নহচোন অম্মীনাদবৰ পুত্র; অম্মীনাদব অদমীন পুত্ৰ; অদমীন অর্ণীৰ পুত্ৰ; অর্ণী হিষ্ৰোণৰ পুত্ৰ; হিষ্রোণ পেৰচৰ পুত্ৰ; পেৰচ যিহূদাৰ পুত্ৰ;

34 যিহূদা যাকোবৰ পুত্র; যাকোব ইচহাকৰ পুত্ৰ; ইচহাক অব্ৰাহামৰ পুত্ৰ; অব্ৰাহাম তেৰহৰ পুত্ৰ; তেৰহ নাহোৰৰ পুত্ৰ;

35 নাহোৰ চৰূগৰ পুত্র; চৰূগ ৰিয়ূৰ পুত্ৰ; ৰিয়ূ পেলগৰ পুত্র; পেলগ এবৰৰ পুত্ৰ; এবৰ চেলহৰ পুত্ৰ;

36 চেলহ কৈননৰ পুত্র; কৈনন অর্ফকচদৰ পুত্ৰ; অর্ফকচদ চেমৰ পুত্র; চেম নোহৰ পুত্ৰ; নোহ লেমকৰ পুত্ৰ;

37 লেমক মথূচেলহৰ পুত্র; মথূচেলহ হনোকৰ পুত্ৰ; হনোক যেৰদৰ পুত্ৰ; যেৰদ মহলালেলৰ পুত্র; মহলালেল কৈননৰ পুত্ৰ;

38 কৈনন ইনোচৰ পুত্র; ইনোচ চেথৰ পুত্ৰ; চেথ আদমৰ পুত্ৰ; আদম ঈশ্বৰৰ পুত্ৰ।