Revelation 7 in Algonquin
1 Ick8a dac ii, nigi 8abamag ni8in ajenig. Kakinagotc ka odjino8enig iji tajigaba8ibanig. Onagackana8aban ega kidji nodinig akikag kek8an kitcigamini, acitc ega iaga pagi kidji madako8ebacindjin mitigon.
2 Acitc dac kodag ajeni nigi odji 8abama, 8abanog e odjisedj. Otakonanaban ii kegoni ke odji kikina8adjibi8agani8indjin a8iagon Kije Manidokag ka pimadizidj ka iji tibendagozindjin. Ogi kitci kiji8ekada8an ini ni8in kodagian ajenin kagi minagani8indjin kidji madji todamindjin akini acitc kitcigamini.
3 Ogi inan oo8eni: “Ka8in maci madji todakegon aki, kitcigami acitc mitigog, pinici kidji gi ick8a kikina8adjibiagid8a oskatigo8akag igi8e ka anokita8a8adjin Kije Manidon.”
4 Nigi nodage dac adi inigik a8iagog kagi kikina8adjibi8agani8i8apan. Midasomidana acitc nimidana acitc ni8in kitci midasomidana8e8agoban (144 000). Midatcin acitc nijin ka inakanezi8adj Israel a8iagokag kakina 8aodjibanig.
5 Midatcin acitc nijin kitci midasomidana (12 000) tacibanig a8iagog pepejig e inakanezi8adj Israel a8iagokag kagi kikina8adjibi8agani8i8apan: midatcin acitc nijin kitci midasomidana (12 000) tacibanig aa8e Coda (Juda) ka ijinikazogobanen ka odakanezindjin, midatcin acitc nijin kitci midasomidana (12 000) tacibanig aa8e Roban (Ruben) ka ijinikazogobanen ka odakanezindjin, midatcin acitc nijin kitci midasomidana (12 000) tacibanig aa8e Gad ka ijinikazogobanen ka odakanezindjin,
6 midatcin acitc nijin kitci midasomidana (12 000) tacibanig aa8e Aser ka ijinikazogobanen ka odakanezindjin, midatcin acitc nijin kitci midasomidana (12 000) tacibanig aa8e Napitali (Neftali) ka ijinikazogobanen ka odakanezindjin, midatcin acitc nijin kitci midasomidana (12 000) tacibanig aa8e Manasa (Manassé) ka ijinikazogobanen ka odakanezindjin,
7 midatcin acitc nijin kitci midasomidana (12 000) tacibanig aa8e Simian (Siméon) ka ijinikazogobanen ka odakanezindjin, midatcin acitc nijin kitci midasomidana (12 000) tacibanig aa8e Lepi (Lévi) ka ijinikazogobanen ka odakanezindjin, midatcin acitc nijin kitci midasomidana (12 000) tacibanig aa8e Issakar ka ijinikazogobanen ka odakanezindjin,
8 midatcin acitc nijin kitci midasomidana (12 000) tacibanig aa8e Sebilan (Zabulon) ka ijinikazogobanen ka odakanezindjin, midatcin acitc nijin kitci midasomidana (12 000) tacibanig aa8e Josep (Joseph) ka ijinikazogobanen ka odakanezindjin, midatcin acitc nijin kitci midasomidana (12 000) tacibanig aa8e Bendjamin (Benjamin) ka ijinikazogobanen ka odakanezindjin.
9 Ick8a dac ii, nigi 8abamag kitci mane a8iagog, ozam ki mane8ag kidji gi agimagani8i8adj. Kakina pepakan ooma akig 8aodjibanig. Kakinagotc ka inakanezi8adj, 8edji8adj, acitc ejigij8e8adj, kakina iima tebanig nigan Kije Manidon okitci ogima8i tesabi8aganikag acitc nigan Mantcenicesikag. Kakina 8abiginokonaebanig, acitc kakina pepejig cigobi8adagon otakonana8abanin kidji 8abadai8e8adj epitci modjigendamo8adj.
10 Kakina ikidobanig e kitci kiji8e8adj: “Kikije Manidominan ka abidj kitci ogima8i tesabi8aganikag acitc aa Mantcenices, mi igi8e kagi ag8acimigo8ak.”
11 Kakina ajenig 8akanigaba8ibanig kitci ogima8i tesabi8aganikag, kitci anicinabekag, acitc ka ni8indjin kagi kijenimagani8indjin. Ki nibak8i8ag nigan kitci ogima8i tesabi8aganikag, acitc ogi icpenima8an Kije Manidon,
12 e ikido8adj: “Amen! Teb8e iidi! Kikije Manidominan kitci macka8izi, kitci kagita8endam acitc kitci apitendagozi. Apanigotc mig8etc inadan, manadjiadan acitc icpenimadan. Kijigabamik adi epitci icpendagozidj. Amen!”
13 Pejig aa8e ka nijidana acitc nio8adj kitci anicinabeg nigi k8ag8edjimig: “Kikikenimag na igi ka 8abiginokonae8adj? Adi 8edji8adj?”
14 Nigi ina: “Ka8in nin nikikenimasig. Kin kikikenimag.” Nigi 8idamag dac: “Mi ogo8e kagi kitci nanekadjiagani8i8adj, ogi cabockana8a dac. Ogi 8abigizana8an okonasi8an, Mantcenicesan omisk8ini e abadjito8adj.
15 Mi 8edji tajigaba8i8adj ako nigan Kije Manidon okitci ogima8i tesabi8aganikag, acitc apanigotc odanokita8a8an Kije Manidon odaiamiemigi8aminikag. Aa8e ka abidj kitci ogima8i tesabi8aganikag oga 8idji tajikeman acitc oga kana8eniman.
16 Ka8in mina8adj 8ikad kada kodagitosi8ag kidji mamida8askade8adj kek8an kidji mamida8abag8e8adj. Ka8in 8ikad oga ick8azogosi8an kizison kek8an ickodeni ka kitci kijidenig.
17 Aa mega Mantcenices, 8in nena8idj ka iji tedj, pecodj kitci ogima8i tesabi8aganikag, oga nagadjian. Oga iji8inan mokidji8anobikag pimadizi8ini ka migi8emaganig. Kije Manido dac oga toda8an a8iagon ega mina8adj kidji kackendamindjin.”