Cross Reference Matthew 1:16 in Algonquin 16 Tcekap ini og8izisibanin Josepan, mi ini Mani o8idigemaganibanin. Mi aa Mani kagi nta8igiadjin Jesosan, 8in “Kije Manido ka pidjinija8adjin” ka ijinikanagani8indjin.
Matthew 1:20 in Algonquin 20 Ka8in maci ododji onendasinaban adi ke inakamigizidj, apitc ka pi nda 8abamigodjin ka Tibendjigendjin odajenimini meg8adj e nibadj. Ajenin dac ogi igon: “Josep, kin David odanike ojisan, ka8in segiziken Mani kidji iji o8idigemaganian. Teb8e mega Mino Manidon ogi minigon kidji kigicka8adjin abinodjijan.
Matthew 17:1 in Algonquin 1 Ka ick8a nigod8asogonaganig, Jesos ogi madji8inan Pienan, Jakan, acitc Jak o8idjiki8en Johnan. Ogi iji8inan dac ka iji kitci icpadinanig pik8adinani, 8ina8a eta kidji te8adj.
Luke 1:31 in Algonquin 31 Abinodjij kiga kigicka8a. Kiga og8izisinan, acitc dac Jesos kiga ijinikana.
Luke 2:7 in Algonquin 7 Ki og8izisi dac, mi ini nitam odabinodjijiman. Ogi 8ik8enan 8abo8anikag acitc adiko8isini8aganikag ogi iji pimakociman, ka8in mega ta8atesinogoban nibe8igi8amikag kidji iji tajike8adj.
Luke 2:11 in Algonquin 11 Nogom ka onag8icig David ododenamikag, pejig a8iag ki pi nta8igi ke ag8acimadjin a8iagon. Mi aa Kije Manidon ka ikidonigobanen kidji pidjinijaogodjin, mi aa ka Tibendjigedj.
Luke 9:32 in Algonquin 32 Pien acitc ka 8idjiogodjin niba8agoban ii meg8adj. Apitc dac ka odji kockozi8adj, ogi 8abadana8a Jesosan odicpendagozi8ini acitc ogi 8abama8an ini nijin naben e 8idjigaba8itagodjin.
John 1:1 in Algonquin 1 Kitci 8eckadj, ab8amaci Kije Manido ka kijendag akini, aja tegoban a8iag, “Kije Manido Odanim8e8in” e ijinikanagani8igobanen. O8idji8agoban Kije Manidon acitc Kije Manido8iban.
John 1:16 in Algonquin 16 Kakina kigi minigonan oca8endjige8inan. Epitci kije8adizidj, minamina8adj kigi ca8enimigonan.
John 2:11 in Algonquin 11 Midac ii Jesos ka todag Kana odenag, Galilee akikag, nitam ka mamada8izigobanen. Ki 8abadai8e iidi odicpendagozi8in, acitc okikinoamaganan ogi teb8etagon.
John 3:16 in Algonquin 16 Kije Manido mega epitci sagiadjin a8iagon, ogi pidjinija8an Og8izisan ka motci pejigondjin. Kakina dac a8iagog ke teb8eta8a8adjin Kije Manidon Og8izisini, ka8in kada 8anicisi8ag, tiegodj oga aiana8a kagige pimadizi8ini.
John 3:18 in Algonquin 18 A8enenigotc teb8eta8adjin Kije Manidon Og8izisini, ka8in tibakonagani8isi. Anic dac a8enenigotc ega teb8eta8adjin, aja tibakonagani8i, ka8in mega ododji teb8eta8asi8an Kije Manidon Og8izisini ka motci pejigondjin.
John 6:51 in Algonquin 51 Nin pak8ejigan 8ak8ig kagi pi odjisedj, kagige pimadizi8ini e migi8edj. A8enenigotc ke am8ag8en ini pak8ejiganan, kagige kada pimadizi. 8adan oo8e nia8, mi 8aa pak8ejigan ke migi8eian, kidji gi pimadizi8adj a8iagog.” Mi ka ikidodj Jesos.
John 11:40 in Algonquin 40 Jesos ogi nak8e8ajian: “Kana kigi 8idamaosinon kidji 8abadaman Kije Manido odicpendagozi8in kicpin teb8etaman?” ki ikido.
John 12:40 in Algonquin 40 “Kije Manido ega kidji 8abindjin ogi todan, ogi cibictig8anean, ega kidji gi 8abindjin, ega kidji gi nisidotamindjin, acitc ega kidji pi k8ekigaba8indjin ninikag, kidji gi kigeag8aban.”
John 14:6 in Algonquin 6 Jesos ogi nak8e8ajian: “Misa nin mikana, nin teb8e8in, nin pimadizi8in. Ninikag eta a8iag oga odji kackiton kidji ijadj Nidadamikag.
John 14:9 in Algonquin 9 Jesos ogi nak8e8ajian: “Pilip! Kana maci kikikenimijisi? Aja 8eckadj ki8idji tajikeminom. Aa ka 8abamijidj, aja ogi 8abaman Nidadaman. Adi dac 8edji ikido8an: ‘8abadaicinam Kidadam’?
John 17:22 in Algonquin 22 Kin kigi minijinan kidji icpendagozian. Mi pejig8an nigi minag kidji icpendagozi8adj, mama8i kidji gi pejig8eiendagozi8adj, tabickotc kin acitc nin ka iji pejig8eiendagoziak.
Acts 13:33 in Algonquin 33 aja nogom ogi ojiton kina8it odji odanike ojisi8an. Ogi ojiton e abidjibaadjin Jesosan. Tabickotc ka iji nabo8adamak Kije Manido Omazinaigan, eko nijinigin 8eckadj Kitci Nigamo8inan: ‘Kin nig8izis. Teb8e ninikag kidiji odadaminan ogajigag.’
Romans 1:3 in Algonquin 3 Kije Manido Og8izisan mikomagani8i8an iima min8adjimo8inikag, Jesos Christ ka Tibeniminak. Apitc ka pi anicinabe8iidizodj, ogima Davidikag ki pi odaiagizi.
Romans 8:3 in Algonquin 3 Kakina a8iag cagozi, acitc ka8in a8iag okackitosin kidji ndotagin Coda8inni Inakonige8inan, kidji gi odji odisigodj pimadizi8ini. Kije Manido dac ogi pidjinija8an 8in Og8izisan ooma akig, kidji pi anicinabe8iidizondjin, tabickotc kina8it ka patadiak kidji pi ijinagozindjin, kidji pi nda nibondjin kipatado8ininanan odji. Mi iidi kagi iji cagodjitodj patado8ini, ega 8ikad mina8adj patado8in kidji cagodjiigo8ak.
Romans 9:5 in Algonquin 5 8eckadj kikitci anicinabeminabanig Abanaam (Abraham) acitc Aisik (Isaac) acitc Tcekap (Jacob) iji odadabigicino8ag. Ke8in Jesos Christ Israelikag ki pi odji apitc ka pi anicinabe8iidizodj. Kije Manido8i aa, kakina kegoni ka tibendag. Midac kabegotc icpenimadan! Amen.
1 Corinthians 15:47 in Algonquin 47 Adam, aa nitam nabe, ogi kijenimigon Kije Manidon, ajickini e abadjitondjin. Jesos dac 8in, aa ocki nabe, 8ak8ig ki pi odose.
2 Corinthians 4:4 in Algonquin 4 Ka8in teb8etasi8ag, osa mega madji manido, ka ogima8idj nogom ooma 8akidakamig, ogi nagabidama8an ini8e ega ka teb8etamindjin omidonendjigani, kidji gi ega nisidotamindjin. Onaganama8an kidji 8abadamindjin 8asea8ini, min8adjimo8inikag ka odjimaganig, ka odji kikendamonigo8ak Jesos Christ odicpendagozi8in. Tabickotc pejig8an ka ijinagozidj Kije Manido, mi maia ejinagozidj Jesos Christ.
2 Corinthians 12:9 in Algonquin 9 Tasin dac ka Tibendjigedj nigi nak8e8ajiig: “Nica8endjige8in mininan, mi kidji tibiseaban. Apitc mega ako cagozian kin, mi apitc ketci paietenag8ag nimacka8izi8in,” mi ka ijidj. Aja dac nogom nikitci min8endan e mikodaman adi epitci cagozian, mi mega iima 8edinaman kidji aiam8ag Jesos Christ omacka8izi8in.
Galatians 4:4 in Algonquin 4 Anic dac apitc Kije Manido kagi onendag kidji iji8ebanig, ogi pidjinija8an Og8izisan ooma akikag. Ik8ekag ki pi odji nta8igi Jesos, acitc Coda8inni ki inakanezi, inendagoziban dac panima kidji nosoneagin Coda8inni Inakonige8inan.
Ephesians 3:18 in Algonquin 18 Midac ke iji kackito8eg kidji nisidotameg, kigi kakina Kije Manido odanicinabeman, adi Jesos Christ epitci kitci sagiigo8ak. Kiga kikendana8a dac adi epitci micanig osagii8e8in, adi epitci magadeanig, adi epitci kin8anig, adi epitci icpanig, acitc adi epitci koda8anig.
Philippians 2:6 in Algonquin 6 8edjidagotc tabickotc ka ijinagozindjin Kije Manidon ijinagozi. Anic dac ka8in ododji apitendasin panima tabickotc ka ijinagozindjin Kije Manidon kidji iji apitenimagani8idj.
Colossians 1:19 in Algonquin 19 Kije Manido mega ogi onendan mizi8e kidji pidigecka8adjin Jesosan, 8edjidagotc tabickotc 8in ka ijinagozidj kidji ijinagozindjin.
Colossians 2:3 in Algonquin 3 8in Jesos ka kikendamoni8edj ii kagita8endamo8ini acitc nisidotamo8ini Kije Manidokag ka odjimaganigin, tabickotc kegonan ka kitci apitendag8agin kagi kadjigadegin ka ijinag8anigin.
Colossians 2:9 in Algonquin 9 8in mega Kije Manido mizi8e okigickan Jesos Christan o8ia8ini.
1 Timothy 1:14 in Algonquin 14 Kitci ani8ag mane nigi minig ka Tibeniminak okitci ca8endjige8in, acitc nigi odisigonan teb8etamo8in acitc sagii8e8in, Jesos Christ ka minadjin ako ini8e 8inikag ka iji tibendagozindjin.
1 Timothy 3:16 in Algonquin 16 Ka8in a8iag ogagi ana8endasin ii ka kitci apitendag8anig teb8e8ini ka iji teb8etamak, ega kagi kikendjigadenigiban pinici Kije Manido kidji gi ani kikendamonigo8ak! Ki pi anicinabe8iidizo. Mino Manidon ki 8abadai8e8an e k8aiakozidj. Ajenin ogi 8abamigon. Ki mikomagani8i a8iagokag taji ega ka iji kikenimandjin Kije Manidon. Mizi8ekamig mane a8iagon ogi teb8etagon. 8ak8ig ki icpika.
Hebrews 1:3 in Algonquin 3 Mi maia tabickotc epitci icpendagozindjin Og8izisan tabickotc 8in, acitc mi maia 8in tabickotc ejinagozindjin. Onagadjitoni Og8izisan kakina kegoni, e abadjitondjin ini ka kitci macka8izimaganigin odikido8inan. Ogi todan kidji kasiama8agani8indjin a8iagon opatado8ini, mina8adj dac Kije Manidon ka kitci macka8izindjin okitcinikinikag ki iji abi 8ak8ig.
Hebrews 1:5 in Algonquin 5 Ka8in mega 8ikad Kije Manido ododji inasin pejig ajenin adi kagi inadjin Og8izisan: “Kin Nig8izis. Teb8e ninikag kidiji odadaminan ogajigag.” Ka8in kek8an 8ikad ki ikidosi iidi eji mikomadjin pejig ajenin: “Ninikag kada iji odadami, acitc 8in, mi aa ke Og8izisian.”
Hebrews 2:11 in Algonquin 11 Jesos, 8in ka kasiama8adjin a8iagon adi ka iji patadindjin kidji gi paiekideeadjin, acitc dac ini8e ka paiekideeagani8indjin, mi pejig8an kakina eji odadamindjin. Midac Jesos 8edji ega agadjidj “nidjiki8eg” kidji ijinikanadjin ini8e kagi paiekideeadjin.
Hebrews 2:14 in Algonquin 14 Ini dac abinodjijan ka mikomadjin, mi igi a8iagog ka pimadizi8adj ooma akikag, ka o8ia8i8adj. Ki ani a8iago8i dac aa Jesos tabickotc 8ina8a, e ani o8ia8idj ke8in, kidji gi nibodj, ii dac kidji gi odji nici8anadjiadjin madji manidon, ini8e ka kackitondjin kidji nisandjin a8iagon.
Hebrews 5:5 in Algonquin 5 Midac pejig8an Jesos Christ ejisedj. Ka8in 8in tibina8e kagi onabamidizodj kidji icpenimagani8idj acitc kidji aiamie ogima8idj ma8adji ka niganizidj. 8in Kije Manido kagi onabamadjin acitc kagi inadjin: “Kin Nig8izis. Teb8e ninikag kidiji odadaminan ogajigag.”
Hebrews 10:5 in Algonquin 5 Ii dac odji, apitc Jesos Christ ka pi tag8icig ooma akikag, ogi inan Kije Manidon: “Ka8in kidodji nda8endasin kidji pagidinigetamago8an ca8endjiganan kek8an a8esizag, kigi minijinan dac nia8.
1 Peter 2:4 in Algonquin 4 Nazikaok ka Tibendjigedj, 8in ka migi8edj pimadizi8ini. Mi maia asini ka abadizidj e migi8amikani8anig ejinagozidj. A8iagog ogi ana8enima8an ini asinin, anic dac Kije Manido ogi onabaman acitc okitci apiteniman.
2 Peter 1:16 in Algonquin 16 Aja kigi 8idamagona8aban kidji pi koki tag8icig ka Tibeniminak Jesos Christ omacka8izi8inikag. Ka8in anodjigotc nidodji ainadjimosimin, e abadjito8agin adisokanan ega ka teb8emagagin. Tiegodj, nina8it tibina8e nigi 8abadam8ananan okitci icpendagozi8in.
1 John 1:1 in Algonquin 1 Kidojibiamagom kidji mikomagidj aa a8iag “Kije Manido Odanim8e8in” ka ijinikazodj, 8in ka migi8edj pimadizi8ini. Aja tegoban ab8amaci kakina kegoni madjisenigiban, e 8idji8apanin Kije Manidon Kidadaminani. Midac ki pi anicinabe8iidizo ooma akikag. Nina8it dac nigi noda8anan ekidodj acitc nigi 8abamanan. Nigi kana8abamanan acitc nigi taginanan. Mi ii 8edji mikomagidj. Ki8idamagom aja egi odisigo8ak aa8e kidji migi8edj kagige pimadizi8ini.
1 John 4:2 in Algonquin 2 Mi oo8e ke odji kikendameg kicpin a8iag kigickagodjin Mino Manidon. Aa a8iag ka ikidodj Jesosan 8in Kije Manido ka pidjinija8adjin egi pi anicinabe8iidizondjin, mi aa8e teb8e ka kigickagodjin Mino Manidon, Kije Manidokag ka odjindjin.
1 John 4:9 in Algonquin 9 8adan oo8e ka todag Kije Manido kidji 8abadai8edj epitci sagiigo8ak. Ogi pidjinija8an Og8izisan ka motci pejigondjin ooma akikag, kidji gi odji minigo8ak kagige pimadizi8ini.
1 John 4:14 in Algonquin 14 Nina8it sa nigi 8abamanan Kije Manido Og8izisan egi pidjinija8adjin kidji ag8acimadjin kakina a8iagon, acitc nipaba tibadjimomin.
2 John 1:7 in Algonquin 7 Kitci mane8ag a8iagog ka 8agackibini8e8adj e paba kikinoamage8adj ooma akig. Odana8etana8a egi pijandjin Jesos Christan ooma akig acitc dac egi pi anicinabe8iidizondjin. A8iag iidi e inendag, mi aa 8a cagodjiadjin Jesos Christan, acitc dac o8agackibinan a8iagon.
Revelation 21:3 in Algonquin 3 Nigi noda8a a8iag kitci ogima8i tesabi8aganikag e odji anim8edj. Ki kitci kiji8e ekidodj: “Ndotamok! Nogom Kije Manido o8idji tajikeman a8iagon. 8inikag kada iji tibendagozi8an. 8in Kije Manido oga 8idji8an acitc kada iji Okije Manidomi8ag.