1 Timothy 6 in Algonquin
1 Kakina anokitage8innig ka tibenimagani8i8adj, panima ki manadjia8adjin okackami8an, ega kidji madji mikomagani8indjin Kije Manidon konigotc ini8e kegonan ka paba kikinoamageiag.
2 Nandam dac anokitage8innig ka tibenimagani8i8adj, okackami8an Jesosikag iji teb8etamon, midac maia ka iji 8idjiki8edi8adj ejinagozi8adj. Panima dac misa8adj ki manadjia8adjin okackami8an. Na8adj dac kiabadj panima 8e8enda ki anokita8a8adjin. Odanokita8a8an mega Kije Manidon odanicinabemini ka sagia8adjin. Mi ke iji kikinoamagean acitc ke iji kagik8ean.
3 A8iag pakan iji kikinoamagedj, ka8in oteb8eta8asin ka Tibendjigendjin Jesos Christan odikido8ini ka teb8emaganig, acitc ka8in oteb8etasin kikinoamage8ini ka odji kikendamak adi ke inadiziakoban kidji min8enimagani8idj Kije Manido.
4 Misa dac igi a8iagog pakan ka iji kikinoamage8adj kitci kitenimodog8enag. Ka8in teb8e kegoni okikendasina8a. Akozi8ag omidonendjigani8akag, mi eta 8i kaganondi8ag, acitc 8i kaganozo8ag ikido8inan odji. Mi iima 8edjimagagin odendamo8in, kaganondi8in, acitc manendjige8in acitc kidji madji inenimadjin a8iagon.
5 Apanigotc aiajidemidi8ag. Madji kegonan mega omamidonendana8an, acitc ka8in aja okikendasina8a Kije Manidon oteb8e8ini. Odinendana8a mega: “Niga kitci coniakemin kicpin anokita8agidj Kije Manido.”
6 Teb8e kitci 8anadizi a8iag ka anokita8adjin Kije Manidon, kicpin min8endagin kegonan ka aiagin.
7 Ka8in mega kegon kigi pidosinanan ooma 8akidakamig apitc ka nta8igiak, acitc ka8in kegon kigagi madjidosinanan apitc nibo8ak.
8 Midac kida min8endananan kicpin aiamakonin midjim acitc pitcikonaanan.
9 A8iagog ka nda8endamo8adj kidji 8anadizi8adj, mi igi8e madji manidon ka k8ag8e 8ik8adjiigo8adjin kidji patadi8adj. Midac maia ka tasozo8adj ejinagozi8adj. Okitci nda8endana8an mane anodj kegonan ke pakebinigo8adjin. Oga nici8anadjiigona8an mizi8ena ini omadji mosa8endamo8ini8an.
10 Epitci sagiagani8idj conia, mi iima 8edjimagagin kakina madji kegonan. Nandam a8iagog Kije Manidon omikanani ogi nagadana8a epitci 8i 8anadizi8adj, acitc mi 8edji kitci kodagiidizo8adj.
11 Kin dac Timote, kidanokita8a Kije Manido. 8imackan dac kakina ini8e madji kegonan. K8ag8edjiton kidji k8aiak8adizian, 8e8enda kidji anokita8adj Kije Manido, kidji sogi teb8etaman, kidji sagii8ean, kidji cacibendaman, acitc kidji nokideean.
12 Kana8endan kiteb8etamo8in, e kitci k8ag8edjito8an adi epitcian kidji nosone8adj Jesos, tabickotc pimibato8aban ka iji k8ag8edjikandinani8ag. Midac kiga aian kagige pimadizi8in. Kigi inig mega Kije Manido kidji minikiban ii pimadizi8ini apitc kagi nd8e8emikiban. Kigi 8idamage dac e teb8eta8adiban Jesos ka iji kitci manenani8ag.
13 8e8enda kida ndotaojinan ke iji 8idamonan. Ki8abamigonan mega Kije Manido, mi aa8e kakina kegoni ka nodjimotodj. Jesos Christ acitc ki8abamigonan, mi aa8e 8e8enda kagi tibadjimodj oteb8etamo8in apitc ka inasamigaba8ita8agobanen ini Pons Pilatan (Ponce-Pilate).
14 Kik8ag8edjimin dac kitci 8e8enda kidji nosoneaman ii kagi iji anonigo8an kidji todaman, ega kidji panaagean acitc ega kegon kidji gi inactaonigo8an, pinici kidji koki tag8icig ka Tibendjigedj Jesos Christ.
15 Kije Manido oga pidjinija8an Jesosan apitc nda8endag. 8in Kije Manido kitci icpendagozi acitc 8in eta kitci ogima8i, mizi8e a8ian e tibenimadjin. 8in sa okackakanan kakina ogiman acitc 8in otibeniman kakina ka tibenimi8endjin.
16 Mi aa eta ega 8ikad ke nibodj. Ka iji kitci 8aseanig iji te, taji ega a8ian ke iji kackitondjin kidji pec8abamigodjin. Ka8in a8ian 8ikad ododji 8abamigosin acitc ka8in a8ian ogagi 8abamigosin. Kagige kada manadjiagani8i acitc kagige kada kitci macka8izi. Amen.
17 Kiga inag igi8e ka 8anadizi8adj ooma akig ega kidji kitci kitenimo8adj. Kiga inag kidji iji apacenimo8adj Kije Manidokag, ka8in 8in o8anadizi8ini8akag. Ka8in mega kigagi ketcinamendasinanan apan kidji aiamakonin ini kegonan, anic dac Kije Manido kitci ani8ag mane kegoni kiminigonan kidji min8endamak.
18 Kiga 8idama8ag kitci mane mino kegonan kidji todamo8adj, kidji 8i mino ijitcige8adj, kidji min8endamo8adj e migi8e8adj, acitc kidji 8i 8idjia8adjin kodagian a8iagon.
19 Kicpin ii todamo8adj, kada ma8adjitamadizo8ag 8anadizi8inan apanigotc ke kitci min8acinigin acitc apanigotc ke tag8anigin. Mi kidji gi aiamo8adj 8edjida pimadizi8ini.
20 Timote! 8e8enda kana8endan ii ca8endjige8ini Kije Manido kagi minik. Ojimik igi8e anodj kegonan ka aikido8adj, ega Kije Manidokag ka odjimaganigin. Ojimik igi8e ka k8ag8e cagozomidi8adj teb8e8ini odji, “Nikikendananan teb8e8in” ka inendamo8adj, acitc ka 8agackimidizo8adj.
21 Nandam mega ikido8ag e kikendamo8adj teb8e8ini, anic dac ki pakese8ag, ega aja k8aiak e teb8etamo8adj. 8egona Kije Manido minigo8eg okitci ca8endjige8in kina8a kakina. Nin Pon